中環出更：梁高美懿分享投資哲學
有人話精明女人最叻儲私己錢，身為恒生第一個女大班嘅梁高美懿，唔使問都知佢係精明女人。尋日梁太喺百忙中抽空出席「Beta Gamma Sigma 香港浸會大學分會成立典禮暨第一屆會員頒授典禮」，之後仲同學生分享佢對經濟嘅睇法，認真唔話得。
講到點樣處理自己啲錢，佢話自己現金、債券、股票、磚頭咩都有啲，但唔會將所有蛋放晒落同一個籃，仲會量力而為，相當穩健。咁四平八穩嘅投資方法，佢話一早已經傳授晒畀兩個女。
兩女初長成
梁家兩女初長成，仲已經投入勞動巿場。梁太話自己係一個勤力嘅人，當年未畢業已經搵定銀行做見習生，一除低件畢業袍就即刻有工開，搵到工先跳槽，不過佢就笑言唔知兩個女有無遺傳佢勤力嘅DNA。不過咁，世界日新月異，科技一日千里，梁太謙稱有好多嘢都唔識，遇到難題就會請教番兩個囡囡，睇嚟梁太呢個大班媽咪一啲都唔專制喎。
卓妮