政情：譚耀宗曾德成扭纏不清
因為一場「申亞」爭議，民政事務局局長曾德成同民建聯打晒交，扭纏不清，而且似有愈演愈烈之勢。繼上星期德成局長喺十八區區議會正、副主席面前，點名直斥民建聯主席譚耀宗急就章表態反對申辦亞運會，令政府無彎轉後，尋日地區又傳出雙方鬥法消息，指民建聯向民政局申請五千張電子動態版《清明上河圖》展覽入場券觸礁，今次輪到德成局長唔撐民記，唔知係咪因為申亞一役遭民記殺個措手不及，有意還以顏色。
民記中委會通過反對港府申亞，負責推銷諮詢文件嘅德成局長發惡，將申亞處於劣勢推落譚Sir身上。譚Sir唔係省油的燈，據聞，佢喺前晚中委會再討論申亞時，嚴肅警告黨員，要跟中委會決定，如果要撐申亞，事先必須跟程序申請豁免，又要大家就申亞一事封口，由佢做總發言人，明顯有意鎮壓申亞亂局，亦係一種抗衡德成局長嘅姿態。
正當德成局長同譚Sir關係「又傾又砌」之際，尋日地區傳出一段消息，令二人關係轉差嘅傳聞更囂塵上。電子動態版《清明上河圖》在港掀起撲飛熱潮，十蚊一張嘅門票被炒至二百三十元，非常渴市，消息指，民記地區早前收到總部訊息，可獲民政局派發五千張門票，各支部於是組團參觀，做晒宣傳，點知前兩日收到回覆，話不獲發門票，即刻打瀉籮蟹，叫晒救命，焗住向旅行社洽購，貼錢荷包出血事小，民政局喺民記反對申亞後，通知民記不獲發門票，隨時被解讀為報復民記，呢個政治訊息先至可大可小。
譚Sir彈民政局唔公道
我哋打電話問譚Sir，佢話民記的確向當局申請《清明上河圖》展覽團體門票五千張，但當時已獲告知只有學校同社福機構先合資格，佢哋只係姑且入紙一試，申請失敗，同申亞爭議扯唔上任何關係，又指總部從未向支部發放有免費飛嘅訊息，可能係有啲人誤會咗咁話。不過，譚Sir亦彈咗兩句德成局長治下嘅民政局，話政黨都係為人民服務，點解社福機構有飛派，佢哋就無？似乎唔係幾公道！
今次民記申請《清明上河圖》門票碰釘事件，究竟係咪如傳聞般咁多政治因素，外界難以證實，不過，外界覺得德成局長同譚Sir關係愈嚟愈差，似乎走唔甩，仲有，身兼新界社團聯會理事長嘅民記西貢支部主席溫悅球話，下月喺區議會上難免要跟聯會立場支持申亞，面對連場申亞亂局，譚Sir能否收拾爛攤子，就睇佢嘅功力嘞。