中環出更：孫秉樞星辰靚錶贈田少
鐘錶業老行尊孫秉樞代理星辰錶（CITIZEN）幾十年，最近決定喺太子始創中心地下開設本港首間星辰錶專門店，尋日正式開幕。孫秉樞邀得旅遊發展局主席田北俊做嘉賓，仲向田少送贈一隻價值近一萬三千元嘅光動能電波時計，雖然呢款錶唔及田少手上隻IWC鋼帶飛行腕錶咁名貴，但田少大讚隻錶夠實用。
呢款光動能電波時計可顯示廿六個城市時間，每去到每個城市時，手錶就會接受星辰發射站嘅訊息，繼而自動調校至當地時間，錶身以鈦金屬製造，較不銹鋼質料輕四成，難怪田少戴起隻錶都驚訝好輕身，話啱晒佢戴去滑雪，最好係毋須調校時間，嚟緊農曆新年就會戴隻錶去外地滑雪試吓。
至於點解直到現在先開設專門店，孫秉樞話只係順應潮流，事關好多有名氣嘅品牌都會開設專門店，一來款式會比較齊全，二來可以更全面服務顧客，例如耐心解答手錶嘅科技及設計功能問題。
孫秉樞又話，目前本港不僅中環及尖沙咀兩個旺區，其他地區亦好有消費潛力，所以喺太子開店都有得做喎！