政情：張大千贈畫無分貴賤
中國國畫大師張大千嘅作品一直都係搶手貨，其中一幅作品《愛痕湖》早幾個月更錄得超過一億人民幣嘅拍賣價，都咪話唔犀利。張大千另一幅力作《金箔荷花》尋日首次喺香港展出，張大千嘅千金張心慶更加專程由內地來港，出席由尋日起一連三日喺中央圖書館舉行嘅紀念張大千111歲華誕藝術精品展開幕禮。年逾八旬嘅張心慶聲如洪鐘，每提及爸爸張大千，總流露出欣賞同自豪嘅神情。
張心慶憶述，早於一九六三年，佢曾經同爸爸來過香港，下榻彌敦道某間酒店，當年有兩位年輕嘅酒店職員見到張大千大駕光臨，即時請佢親手畫幅畫作畀佢哋。張大千一口答應，即席揮毫，咁啱有位老紳士經過，見到幅畫咁靚，即刻開聲要買咗佢，仲講明會畀合理價錢。點知張大千冇心動，仲同個老紳士講，幅畫已經有人要咗，就係身邊兩位酒店職員。搞到個老紳士聽到唔係幾高興，面帶慍色自謔話：「原來我還比唔上這兩位年輕人。」
張大千聽完後不慍不火話，無論對咩人，即使係平民百姓佢都係一視同仁。最終個老紳士悻悻然離開，而嗰兩位有幸得到大師贈寶嘅年輕人即時淚流滿面，讚張大千唔單止畫靚，連心靈都一樣靚。件事發生喺一九六三年，距今四十幾年，唔知當日獲贈名畫嘅兩位職員，依家身處何方，又有冇好好保存幅畫呢？