政情：入境處二哥拜關二哥
警察拜「關二哥」就聽得多，原來專責拉黑工嘅入境處阿Sir都有拜「關二哥」。咁啱得咁蹺，被視為入境處一哥接班人嘅副處長陳國基，尋日同其他紀律部隊阿頭，包括懲教署新一哥單日堅、警務處刑事及保安處處長鄧甘滿同消防總長黎文軒，一齊出席深水埗關帝廟門樓落成典禮，齊齊拜「關二哥」。會上仲有一位神秘嘉賓，佢就係四叔李兆基嘅師傅、中國道教協會會長任法融，唔知佢會唔會見吓四叔？
咪以為入境處阿Sir淨係喺機場同邊境幫旅客揼印，佢哋仲要打擊黑工同假證件等非常任務。有入境處阿Sir同我哋講，佢哋部分同事都會拜吓關二哥。至於佢哋部門嘅二哥陳國基，明年三月好大機會接替退休嘅白韞六成為一哥，到時就要改口叫陳一哥。