白鴿黨主席何俊仁尋日喺記者會上話，該黨早前見煲呔曾時，首次建議佢將動物權益納入政策。其黨友張文光亦講，對呢個動物政策好有「好感」，無諗過港府咁快做嘢，仲笑言，如果港府對取消區會委任制都咁易話為，就發達喎。
不過，白鴿黨呢次似乎叻唔切。翻查紀錄，民建聯陳克勤早於去年已經喺立法會大會口頭質詢，問當局可否增加寵物公園數目，早前更將興建寵物公園同成立保護動物警察正式寫入民記嘅施政報告建議書。如果煲呔曾聽民意，克勤仔都可以分一杯羹。如果白鴿黨以為自己真係咁有影響力，未免太天真太傻嘞！其實，漁護署人員早前被揭捕捉流浪狗時涉嫌虐狗，惹起非議，施政報告今次想幫漁護署補飛就真啦！