政情：黃婉曼免費騷撐政府

Icy一開場就話：「今日係黃婉曼同你哋一齊睇吓施政報告！」然後帶大家巡遊全港各區，先後介紹天水圍嘅就業及培訓中心、荃灣嘅仁濟醫院重建，以及青衣、沙田、大埔嘅置安心資助房屋計劃，仲有旺角、中環、銅鑼灣嘅低排放試點。Icy又帶大家捐入地下，介紹港鐵轉車站將提供還書服務，跟住又跳出香港，介紹內地養老嘅長者福利配套。

據聞特首辦一星期前搵Icy幫手拍短片，尋日施政報告發表時再出外取景拍攝，先後到過秀茂坪、將軍澳及中央圖書館，並以地政總署會議室掛牆大地圖做背景，全程由特首辦特別助理陳岳鵬（Ronald）陪伴左右。Ronald激讚Icy形象正面又夠紅，仲有新聞傳媒背景，拍攝過程得心應手，睇怕今次都係Ronald上任以來最好嘅回報囉。