政情：釘契風波 林健鋒幫發叔解圍
經濟動力4L之一嘅行會成員劉皇發，自捲入漏報買樓利益風波後，一直鮮有露面。尋日立法會正式復會，煲呔曾發表施政報告，發叔終於現身，亦有出席經濟動力記者會，成為議事堂內外嘅另一個焦點。
發叔同林健鋒、梁君彥及梁劉柔芬一齊開記招，4L整整齊齊亮相，攞住本施政報告影大合照。不過，發叔之後未有發言，將點評施政報告嘅發言機會讓晒畀3L。發叔旗下嘅宏景投資持有嘅四幅農地，部分地段租予他人後被改建為野戰場，瀕臨被「釘契」危機，尋日大家趁機會想向發叔問過清楚，但遭反應奇快嘅林健鋒攔截，叫大家問番施政報告內容，發叔有佢幫手解圍，直到記招結束無出過一粒聲。
尋日幫發叔解圍嘅仲有煲呔曾。佢喺施政報告記者會上，被指喺漏報風波中「攬」發叔，煲呔曾一邊回應話，唔明個「攬」字係乜嘢意思，一邊又「攬」發叔多一次，強調相信發叔旗下公司嘅物業買賣已喺田土廳有登記，所以發叔先至無向行會申報啫。