政情：毓民慘變立會獨眼龍
立法會尋日舉行新一屆立法會年度第一次內務委員會會議，個個議員放完暑假都精神奕奕，唯獨社民連前主席黃毓民成個「獨眼龍」咁現身，原來一直係大近視嘅毓民，前日陪老婆驗眼時，發現自己左眼視網膜穿咗個窿，要即刻做手術，搞到左眼依家要用棉花包紮，否則見到光會痛到飛起。
毓民仲話兩隻眼都有好多問題，右眼嘅黃斑點穿咗，兩隻眼都有輕微白內障，月尾要做多次手術，防止視力惡化。患上眼疾令毓民更關注長者眼部健康，希望政府同富豪盡啲責任，資助長者做白內障手術。咁如果下周三嘅施政報告無交代，毓民係咪一定反枱，好似以往咁掟蕉、掟道具先？
睇怕鍾意見社民連畀立法會主席趕走嘅朋友會失望喇，事關今次施政報告之後要傾郊野公園廢法議案，所以社民連三子今次決定克制啲，以免被趕出議事堂投唔到票，因為投票事小，表態事大，尤其「長毛」梁國雄仲要喺新界東競逐連任，咁大件事，唔參與其中點向選民交代呀？