政情：高官轉性撐白鴿黨慶
白鴿黨支持通過政改後，迅即水漲船高，港府高官對該黨變得好聲好氣，連尋日該黨十六周年黨慶，一眾高官都畀面撐場，問責局長就去咗六個，真係大開眼界。
近期為推銷骨灰龕及醫療保險頻頻曝光嘅食物及衞生局副局長梁卓偉，打頭陣同李華明合唱《沉默是金》，莫非暗示叫白鴿黨今後乖啲沉默啲？梁卓偉唱完送咗支玫瑰花畀卿姐，好識做。
梁卓偉表演完，交棒畀民政事務局副局長許曉暉（Florence），同黃成智合唱任白金曲《劍合釵圓》，可惜成智有字幕都唔識唱，開頭要Florence做獨腳戲，去到中段至識唱，睇嚟成智要惡補至得。全國政協委員劉夢熊以十萬元投得靚紅酒，仲指白鴿黨喺政改方案上理性務實，值得肯定。其中「四叔」李兆基旗下嘅恒基地產及煤氣公司，分別以五萬元及三萬元投得六支有機紅酒。連同其他籌款，成晚籌得高達一百萬元。
高官空群撐場之餘，仲有大批警察守住門口，防止社民連踩場。黨慶喺尖沙咀一間商場嘅酒樓舉行，咁啱華置非執董劉鳴煒嚟巡視商場，唔知仲以為佢去撐白鴿黨。
講開又講，立法會內務委員會及財務委員會尋日選正、副主席，內會主席劉健儀及財委會主席劉慧卿喺無對手下冧莊，三分鐘選完，好耐未試過咁和諧。