政情：陳晴坐正兒童基金會

眨吓眼，陳晴加入兒童基金會已經六年，佢好投入基金會工作，即使大住個肚，都不惜長途跋涉去雲南探訪愛滋村孤兒，仲話懷孕都唔會停止慈善工作。佢獲悉升任主席後好開心咁話，未來一年會同所有委員竭盡所能，為世界兒童帶來改變與希望。

陳晴同時係香港海洋公園保育基金主席，去年又獲委任為臥龍大熊貓俱樂部榮譽理事長。佢同熊貓好有緣，事關自從佢認養咗大熊貓「晴晴」之後，當正晴晴係佢囡囡，連女人至愛嘅手錶、頸飾都係熊貓公仔，一見到佢自然聯想到熊貓。除咗陳晴任主席之外，基金會都委任吳世振、于善基為副主席，歐陽贊邦為司庫。