政情：三散人撐「廢法」邱騰華玩完
港府擴建將軍澳堆填區計劃演變成行政與立法機關「大鬥法」，立法會動議廢除相關法令係咪一竟全功，就睇功能組別一關能否湊夠過半數嘅十六票。數數手指，泛民、自由黨、民建聯、工聯會加專業會議嘅石禮謙，已有十三票企硬支持廢法，只欠三票，於是五散人成為足以左右大局嘅關鍵，結果，「I.T.豪」譚偉豪、會計界陳茂波同保險界陳健波尋日終於表態，未來幾日如無突破性發展，就會支持廢法，令政府形勢岌岌可危，隨時玩死主推擴建計劃嘅環境局局長邱騰華。
立法會下周三正式復會，例牌菜係施政報告，但今年多咗一道甜品，加插辯論表決兩條議案，一條係由公民黨陳淑莊提出嘅廢除擴建將軍澳堆填區法令議案，一條係政府提出將法令實施日期押後十四個月至二○一二年一月「自動波」生效嘅議案。不過，呢道甜品對政府嚟講，一啲甜頭都嘗唔到，只會嘗到辛辣苦澀，事關擴建計劃已面臨觸礁危機。
功能組別湊夠過半數票
對擴建將軍澳堆填區，兩個議案一正一負，其實係一個硬幣嘅兩面；由於要先表決廢法議案；若能通過，政府嘅「延期」議案就自動送上斷頭台，毋須投票。廢法議案喺地區直選必過無疑，依家焦點落喺三十席功能組別議員身上。按最新形勢，功能組別之內，泛民四票、民建聯三票、自由黨三票、工聯會兩票同專業會議石禮謙，全部企硬支持廢法議案，正當議案尚欠關鍵三票先至能確保通過之際，五散人尋日終於表態，陳茂波、譚偉豪同陳健波表明會支持廢法議案。
至於其他功能組別議員，「廢法」態度依然未明朗，好似五散人之中嘅廠商會代表林大輝同「怪醫」梁家騮都話未有最後決定。大輝話，先待釐清立法會有冇廢除法令權限，先至談下一步。勞工界李鳳英、旅遊界謝偉俊同專業會議劉秀成亦繼續扭擰，唔肯表明清晰取態。不過，佢哋最後點投票似乎已經變得唔重要，有咗五散人三票，邱騰華差唔多已經被打落十八層地獄，翻身機會微乎其微囉。