投訴：流動平安鐘社署欠資助
現時合資格長者可獲社會福利署發出平安鐘津貼，但不包括流動平安鐘。陳女士指其母獨居於石硤尾邨，每日均會「落街行吓」以消磨時間，「佢試過蕩失路，報咗警至搵得番。人哋叫我買個流動平安鐘畀佢，但我又冇錢、社署又冇資助。假牙都有資助，點解呢啲冇？」
社署指選擇進行戶外活動的長者一般具備自理能力，否則應由合適人士陪同。發言人又指，室外平安鐘及長者手機均有接收盲點，並存在電力不足等均為風險，故該署暫不考慮資助戶外平安鐘產品費用。
但該區區議員譚國僑認為，社署絕對需要將流動平安鐘列入資助項目，「老人癡呆症、認知及記憶力衰退，喺長者身上係好普遍。」譚指有關儀器有助迅速找出佩戴者位置，亦可減省動用大量警力搜尋失蹤者。