政情：伍穎梅甜蜜遊電車河
人逢喜事精神爽，好似有「九巴金公主」之稱嘅九巴後人伍穎梅（Winnie）咁，早前畀我哋影到同低調富豪許世勳嘅姪仔、中建企業董事許晉平「手疊手」談心，一直到依家都春風滿面。尋日Winnie出席一個公開活動，我哋梗係要第一時間恭喜佢，Winnie雖然笑而不語，但聽到「許晉平」個名就笑到合唔埋口，甜到入心嘅樣子點都呃唔到人嘅！
其實佢哋兩個都係大忙人，要搵時間拍拖真係唔易。不過Winnie話，有心嘅話點都會搵到時間，因為工作時專心工作，玩樂時就要專心玩樂喎。一般情侶拍拖就行街睇戲啫，兩位名人又有咩節目先？Winnie就自爆，自己好鍾意搭電車，因為可以舒舒服服慢慢睇街景，仲甜絲絲咁話，最近許生啱啱帶佢坐完一次添！
最估唔到嘅係，Winnie原來好鍾意搭公共交通工具，除咗電車，周不時都會去坐船同纜車，好似唔慢唔喜歡。不過都啱嘅，搭啲慢駛嘅交通工具，兩個人一齊坐，又有風景睇，又可以一齊傾吓偈，確實好浪漫！