政情：高靜芝自嘲無飯夫婦

Sophia笑稱，自己嘅廚藝好一般，只識煎荷包蛋、煮公仔麵同埋炸春卷，結婚咁多年，老公竟然從未享受過佢嘅手勢，只係兩個囡囡試過。至於老公嘅拿手菜，係獨沽一味嘅煎牛扒，Sophia食過兩次咁多，一次係喺結婚之前，另一次就係結婚之後，勁搞笑。

高靜芝笑言，佢哋兩公婆係名副其實嘅「無飯夫婦」，喺屋企好少煮飯，好彩老公同兩位囡囡都唔抗拒出街食。查實Sophia又確實好忙，話佢係百分百嘅事業型女強人都唔過分。佢嘅公職多到數唔晒，除咗最具代表性嘅婦女事務委員會之外，同時又係財務匯報局主席，金融世界瞬息萬變，睇少一陣都唔得，呢位靚太有幾忙可想而知。佢公務繁忙嘅程度，唔輸畀啲大男人㗎！