政情：王國興里斯本歎葡撻
工聯會立法會議員王國興同太太上月去咗葡萄牙同西班牙旅行，前後去咗十一日，旅途相當愉快。王國興話，今次旅行可以話娛樂不忘工作，因為除咗旅遊散心、感受兩國風土人情外，佢亦好留意當地會唔會有一啲民生設施同埋環境配套適合香港用。
去到葡萄牙，當然要食吓葡撻啦。王國興今次特登去咗葡撻發源地，一間位於首都里斯本嘅修道院參觀。據聞後來有商人向呢間修道院買咗條秘方，之後仲喺隔籬開咗間店舖「Pasteis de Belem」，將葡撻發揚光大。呢間店舖喺1837年創立，王國興當日去到已經排晒長龍，各國遊客去到里斯本，都梗要試試呢間正宗葡撻店。
王國興當然冇執輸，即時食咗一個，發現確實好好味，佢仲好感慨咁話，如果香港可以好似葡萄牙咁，大力鼓勵發展本地經濟，話唔定都可以有一間港版嘅「Pasteis de Belem」。