政情：發叔訪台請食佛跳牆
區議會主席訪台團曲終人散，期間爆出行政會議成員劉皇發涉嫌漏報買樓及摸貨圖利，搞到負責帶隊、身兼屯門區議會主席嘅發叔好唔得閒，去到台北都被本港傳媒越洋追訪。不過發叔見慣大場面，話咁快就收拾心情，夜晚仲請班港府官員同一眾區會主席去台北國賓大飯店開餐，豪食佛跳牆排翅。
發叔喺十八區主席之中係最資深嘅一個，所以每逢帶隊外訪都習慣請食飯，好似六月帶班正、副主席遊上海世博期間就請食齋宴，今次訪台亦揀咗台北出晒名嘅國賓大飯店。發叔「豪」不手軟，安排一人一個「佛跳牆排翅」，又叫咗出晒名嘅「國賓牛小排」、片皮鴨、大蝦等，淨係餐前小食都有五、六碟，餐飯估計要幾萬港元落樓，相信係成個行程之中最豐富嘅一餐。
KK行到邊影到邊
身為九龍城區議會主席嘅廣東社團總會主席KK王國強，今次都有跟大隊去台灣。KK一向鍾意影相，去到邊都帶住部相機，仲將啲相放上去iPad，今次都唔例外，好似去到士林夜市行街街，佢把手一按，留低咗唔少回憶。