政情：許曉暉電暈維園阿哥

Florence尋日以署理民政事務局局長身份去維園出席《城市論壇》，同與會人士傾近排畀人鬧到爆嘅亞運會。硬食呢舊豬頭骨，以Florence平日講嘢陰聲細氣，去到《城市論壇》仲唔畀人玩死？Florence一坐低，「維園行動」其中一位成員已經開聲撩佢，話：「許副局長，你個樣點解仲後生過上任嘅時候嘅？」

畀人撩從容不迫

一般女性遇到咁嘅情況都會好尷尬，豈料Florence從容不迫，用好溫柔嘅聲線撩番個後生仔：「咁我哋一陣間去飲嘢啦！」此話一出，即時搞到班憤青嘩鬼叫，起初出口撩Florence嘅青年都嚇到呆咗。論壇完咗之後，Florence冇放「維園行動」飛機，真係請晒現場廿幾卅個成員飲嘢。

呢班平時對住建制派咬牙切齒嘅青年，今次對住Florence就好似螞蟻見蜜糖咁，又要握手、又要合照，唔講仲以為Florence入咗社民連。Florence臨走前仲答應班青年話一定會聽佢哋嘅意見。睇嚟維園阿哥都唔係洪水猛獸，局長都要放下身段，向副局學吓嘢。

Florence唔肯透露請飲嘢用咗幾多錢，仲話唔擔心自己所做嘅會對其他副局政助造成壓力，因為大家都好樂意接觸市民喎，連社民連行委「維園阿哥」任亮憲都大讚佢講得出做得到，比起其他高官好得多，仲乘機反問唔肯出席《城市論壇》嘅民建聯：「何懼之有？」臨走時，班年輕人仲係咁問Florence有冇facebook，話要做佢朋友咁話。

講番論壇，Florence尋日只係重複講到悶嘅觀點，好似政府已有完整體育發展政策、搞亞運係長線投資，唔可以用金錢衡量、遲啲會去立會提交財務安排等。佢話，政府嚟緊會繼續落區宣傳，爭取市民支持，有需要會同議員商討長遠體育政策添，至於會唔會因為反對聲音太大而放棄申辦，Florence就冇正面回應喇。

就睇呢幅相，仲以為任亮憲（前左）係許曉暉（前右）嘅觀音兵。 （許紹基攝）

平日憤怒嘅維園青年尋日變咗螞蟻，摟住許曉暉（持水樽者）呢舊蜜糖。