政情：嚴秉泉陳南祿同一「阿媽」生
曾經係鬼才黃霑主診醫生、又將微創心胸外科手術引入香港嘅心胸肺外科專科醫生嚴秉泉，揀咗名醫雲集嘅中環中建大廈開檔，尋日搞個開業茶會，同啲醫生、老友高興吓。除咗樓上樓下開診嘅醫生同各方名醫到賀外，恒地副主席林高演同恒隆地產董事經理陳南祿，都嚟支持嚴醫生。
嚴醫生同林高演相識咗一段時間，佢喺中大外科學系任教廿年，仁安醫院後來開咗個微創外科中心，林高演就向佢招手，搵佢做顧問，仁安院長李繼堯尋日都有嚟恭賀。講到陳南祿，原來佢同嚴醫生都係母校香港華仁書院嘅出品，祿哥仲係佢師兄，兩師兄弟關係唔錯，祿哥仲賣口乖話，佢呢個師弟咁叻，梗係要嚟撐場啦，就連喺嚴醫生樓上開診嘅呼吸系統科名醫余宇超，都到場支持佢。
舖位前身乃林兆鑫診所
嚴醫生轉投私營市場時，診所喺仁安，病人愈來愈多，又無自己診所，就搵地方開檔。佢間診所前身係前港大醫學院院長林兆鑫嘅診所，嚴醫生話，喺中建開診幾方便，機緣巧合之下揀到呢個千二呎單位，籌備咗三個月，今年八月二日入伙，尋日至正式擺入伙酒。