政情：梁美芬Tim霍面前讚啟山
名人二代遲早要接班，大家紛紛出任公職當係練兵，好似立法會議員霍震霆（Tim霍）嘅二公子霍啟山，近期就獲政府委任為海濱事務委員會成員，專業會議成員梁美芬尋日就喺新聞界十‧一酒會上，當住Tim霍面前盛讚啟山做得好。話說尋日立法會海濱規劃事宜小組委員會同海濱事務委員會進行非正式交流會，小組委員會成員梁美芬就大讚啟山發言有板有眼，講得好正路喎！
梁美芬見到Tim霍就話：「起初我仲話唔知點解會有啲咁嘅人加入海濱事務委員會，有冇代表性㗎？但開會之後，啟山畀我印象都幾好！」Tim霍聽到梁美芬大讚自己個仔，即時好快反應話：「係呀，所以傳媒唔好成日話佢（啟山）掛住去玩，其實公務都做得幾好㗎！」
講番尋日新聞界酒會真係得啖笑，酒會原意係招待新聞界，點知記者持有請帖都要被迫困於指定圍欄內；如果高官咁驚記者採訪，不如唔搞好過啦！