政情：王國興逼政府長掛國旗

立法會早喺○五年已通過動議，促請政府建築物、小學、中學及大專院校，喺元旦日、回歸紀念日及十‧一等特定日子要懸掛國旗，點知政府真係踢一踢、郁一郁，只規定呢三個日子要懸掛國旗，解釋話懸掛國旗嘅日子和地點要合法合理，亦要考慮建築物嘅用途、環境係咪莊嚴，仲夠膽話因為有啲地方無旗杆，所以無得掛國旗。

當時曾經踢爆禮賓府只掛區旗但無掛國旗嘅工聯會立法會議員王國興，最近再去信狙擊民政事務局局長曾德成，要求政府帶頭懸掛國旗，增加懸掛國旗嘅地點，藉此加強國民教育。王國興仲要求煲呔曾進一步督促回歸前已有懸掛英國國旗嘅地點，盡快重新掛上中華人民共和國國旗，否則佢誓不罷休，一定追究到底。

新增逾百建築物懸掛

禮賓處處長終於喺大前日覆信畀王國興，答應將去年新增一百零八個政府建築物嘅懸掛國旗時間，由原本懸掛國旗嘅三個特定日子，增加至每個工作天都懸掛國旗，呢啲地方包括十五個政府部門嘅總部大樓、二十幢政府合署、七十二個康文署場地及啟用無耐嘅柴灣青年廣場。其實，唔係今次政府正式嘅答覆都唔知，原來咁多政府重要部門都無長期懸掛國旗，連咁基本嘅嘢都唔做，談甚麼人心回歸？

今次政府表面上看似知錯能改急補鑊，但王國興就狠批政府喺回歸十三年後先至糾正錯誤，相當離譜，反映政府官員國民意識薄弱，難怪人心未能完全回歸。公民教育委員會主席李宗德尋日出席一個十‧一酒會時話，回歸後政府應逐步糾正過去錯誤，多啲地方懸掛國旗，可以增加市民嘅歸屬感。