政情：議員反應慢唔夠新丁玩
嚟緊兩年係選舉年，各個政團都開始鋪路，為有意出選嘅成員增加知名度。港台節目《議事論事》今個月開始進行新改革，搵五大政團各派一名新丁做客席主持，希望製造火花，尋日節目進行首場錄影，頭炮搵咗各政團嘅立法會議員同新丁一齊玩遊戲，點知班議員雖然政治資歷夠，但玩遊戲嘅反應就輸晒，最後仲要主持不斷放水，先同新丁組打成平手。
理解遊戲搞好耐
落場玩遊戲嘅有民主黨劉慧卿、民建聯葉國謙、自由黨劉健儀（Miriam）同社民連黃毓民等，佢哋對住五個新丁主持玩「有口難言」、「耳聽八方」同「單單打打」三個遊戲，明顯力有不逮，連理解遊戲點玩都要搞好耐，班新丁就熟晒規矩，唔贏至奇啦！
好似有個女議員咁，聽番自己同煲呔曾辯論嘅名言「我情願原地踏步都唔想行差踏錯」嘅變聲版，聽咗三次都唔知同自己有關，最後聽正常版時仲要畀新丁組搶答成功，一分都攞唔到。睇嚟呢班議員真係要返立會，先有機會撼贏新丁。