政情：謝卓飛租樓盡覽維港夜景
出任西九文化區管理局行政總裁個幾月嘅謝卓飛，最終喺尖沙咀酒店式住宅港威豪庭落腳，聽講佢揀呢度係為咗近住西九同尖沙咀文化中心，方便佢做嘢或出席活動。我哋上網查過，港威豪庭最平嘅單位租金，都要三萬蚊一個月，佢租住嘅單位有幾貴，我哋就唔知喇，但肯定都唔會平。
嚟自倫敦嘅謝卓飛，早已習慣高生活指數，不過佢剛獲委任時都呻過香港樓價貴，但既然要喺香港打工，點都要搵個地方住。謝卓飛睇過港島同九龍樓盤，最終選擇位處尖沙咀心臟地帶嘅港威豪庭，聽聞係因為佢覺得一來同西九毗鄰，二來亦近文化中心，方便佢出席活動或者睇展覽。
港威豪庭可以盡覽維港夜景，租金自然不菲。嗰度最平嘅開放式單位月租三萬六至三萬八，單房就四萬四至六萬二，最貴嘅就係閣樓，索價四萬二至十六萬多元。謝卓飛都係一支公住，斷估都唔會住到閣樓咁豪啩！