政情：肥亨嘆銀行業唔易做
○八年雷曼兄弟爆煲引發環球金融海嘯，至今兩周年，究竟金融市場有乜轉變呢？金融海嘯前因病離開官場嘅中策集團主席馬時亨回顧呢兩年金融市場，發現多項轉變，包括投資銀行沒落及衍生工具減少、中資銀行抬頭及監管環境改變。肥亨話，銀行被加強監管，經營愈見困難，佢爆料話，就算前港交所行政總裁周文耀開個證券戶口，手續都好繁複。
肥亨笑稱，周文耀開證券戶口要簽成吋厚文件，足足搞咗兩個鐘，證明銀行生意難做，以前一個職員做十單生意，依家就做得一單。不過，肥亨話好彩香港逐步向人民幣離岸結算中心邁進，而人民幣產品愈來愈多，充滿機遇，好似佢年初同傳媒聚會時提議大家買人民幣債券，估計今年有百分之六增幅，至目前匯價和債券價格升幅已將近達標。
百分之六回報或者唔算高，但肥亨話呢門投資風險不大，回報算唔錯。問肥亨點睇日圓升至歷史性新高，佢就話唔敢掂外匯，一來風險大，二來無咁多時間睇住個市喎！