三代運動精英歡度最精彩八月十五

圖：司徒子文 文：李芷韻

70後 趙詠賢合家歡賞月最人齊

自稱是一個傳統中國人的壁球天后趙詠賢，對年幼時過中秋十分回味：「節日中最鍾意聖誕，跟住就係中秋，特別係細個同阿媽阿爸去Picnic賞月玩燈籠，都玩咗十幾年，後來做咗全職運動員就少咗好多，但近幾年中秋都一定會一家人食飯，團圓嘛！」講到回憶，趙詠賢急不及待回答「小白兔」和「楊桃」燈籠是最經典：「好玩o架！我仲記得要周圍問人借火，經常見到人火燒燈籠喊得好淒涼添！」她慨嘆現在小朋友只拿着播「小小世界」音樂兼有小燈膽的卡通吹氣公仔，「呢一代可能失去咗我哋以前細個喺中秋節嘅樂趣了。」

葉姵延

趙頌熙

做節當婚禮預演

還有三天將「變身」為「馮師奶」的趙詠賢，形容今年中秋節就好似為婚禮作預演：「因為好多親戚都由外地嚟咗香港參加我嘅婚禮，而咁啱有個大節日就約埋食飯，名副其實大團圓，當係（婚禮）Warm Up啦！」

歐鎧淳	陳敬然	賀敬德、羅雅菁

賀敬德、羅雅菁攜囡囡回鄉最滿足

同為70後的世界武術冠軍賀敬德及羅雅菁，今年會帶囡囡回鄉與老人家過節，退役後擔任港隊助教的羅雅菁說：「我哋自小就離鄉別井練武，節日只會同教練、隊友度過，但今年可以陪囡囡過節好開心，囡囡見到唔同款式燈籠都好開心，佢話最鍾意係傳統嘅小白兔喎！」

80後 葉姵延雙黃白蓮蓉最滋味

中秋節是「黑妹」葉姵延最愛節日，事關自稱「為食」的她可以盡情吃月餅及各種水果，講到現今月餅款式雖多，但「黑妹」最鍾意都是傳統「雙黃白蓮蓉」。佢話：「我好鍾意食月餅，任何款式都啱，雖然我中秋節已經喺日本打比賽，但我會帶埋月餅同『摺摺』燈籠（即風琴式紙燈籠）過去。」

兔女難忘玉兔燈籠

「黑妹」看似「男仔頭」，但提起中秋節回憶，她如大部分女孩子般鍾意「玉兔」燈籠：「我細個成日叫阿媽買，佢好得意o架！個頭又會郁郁吓，加上我又係屬兔，好似特別有感情。其實我哋嘅年代已經好多燈膽燈籠，多數係卡通人物，後來我跟啲大哥哥姐姐玩，先掉番轉玩點蠟燭嘅燈籠，我覺得咁先有氣氛。」

「黑妹」最難忘係玩風琴式紙燈籠：「我覺得『摺摺』燈籠最靚，玩嘅難度好高，蠟燭如果黐得唔實好易火燒燈籠，好刺激o架！」

陳敬然為囝囝慶生最溫馨

「風之子」陳敬然今年很開心可在港與囝囝慶中秋，並在「追月」日為愛兒慶祝一歲生日，但囝囝生日與香港公開賽相撞，所以要比賽後才慶祝。「阿英」專程買了「三眼仔」吹氣燈籠給愛兒：「我細嗰鍾意玩蠟燭，等阿仔大個啲，我會教佢，等佢知以前係用火點燈籠嘅。」

90後 趙頌熙點傳統燈籠最新鮮

相比起「70、80後」，更年輕的「90後」運動員對燈籠的印象更只是「電玩」的一種。擁有玩燈籠十年經驗的「乒乓神童」趙頌熙坦言未試過玩傳統燈籠：「五歲就開始玩，但第一隻（燈籠）經已係入電池嗰款。每次都只係揸住佢喺公園周圍行，講真都幾悶；所以我都好羨慕嗰啲玩蠟燭嘅小朋友！」

翌日有比賽唔捱夜

雖然今日係中秋佳節，但熙仔沒有打算出夜街慶祝：「明天全港學界精英乒乓球賽開打，要晨咁早入到粉嶺比賽，所以今晚要抖足精神，絕對唔可以玩得咁夜。」

歐鎧淳異地過節最逍遙

至於另一位「90後」運動員「icon人物」歐鎧淳，現身在美國柏克萊大學深造。雖然要在異鄉過中秋，最疼錫的父母也不在身邊，但淳淳在當地認識了不少新朋友，所以絕不感到孤單，一樣逍遙快活。