政情：校名加「官立」 發叔有微言

「係咪攞嚟擋煞先？」

主席劉皇發亦有感而發，話加入「官立」呢兩個字係咪有重大好處？係咪可以攞嚟擋煞先？如果呢個字有咁大能力嘅話，咁咪加番「官立」囉！跟住佢仲加多句，話鄉議局喺元朗嗰間中學，就算冇「官立」兩個字，都係band one學校，好多人報讀吖！佢又話最重要係校董會搞好間學校，振奮班教職員，等學生得到好嘅教學質素。

其實，在場個別執委都認為應該加入「官立」兩個字，話咁就變成大埔區唯一嘅官立中學，隨即又有另一個執委反駁，話大埔官中執笠、沙頭角官中又執笠，擔心會畀人覺得官方「皇氣」太重，「官立」兩個字，唔加好過加。