政情：劉健儀邀卿姐入自由黨？
政改一過，各界都預料小型政團會愈嚟愈難喺政壇立足，所以無論建制定泛民政團，都開始諗定點喺人脈及資源上擴大版圖，避免被淘汰。立法會兩大女將、財委會主席兼民主黨副主席劉慧卿以及內務會主席兼自由黨主席劉健儀（Miriam），尋日就喺網台一齊討論政黨發展。
「唔可以嫁兩次」
Miriam話，香港人個個要搵食，搵人交會費入黨唔難，但要佢哋參與會務就唔係個個肯，仲形容入黨好似結婚一樣，好難搵到合拍伴侶。卿姐好認同，仲對自由黨招募黨員嘅程序好有興趣，問Miriam點揀會員。點知Miriam好鬼馬，唔漏口風之餘，仲叫卿姐申請入黨體會吓，搞到卿姐口啞啞。最後Miriam打圓場，話明白呢個要求難咗啲，因為大家都「唔可以嫁兩次」喎！
其實佢哋兩個都經歷過不太愉快嘅婚姻，此話一出，難免有啲尷尬，最後惟有講番搵錢問題。外界都話自由黨好富貴，點知Miriam話家家有本難唸的經，仲話富貴嘅只係前主席田北俊一個，仲叫卿姐得閒資助吓佢添！