政情：李嘉誠獲胡錦濤接見 范太：唔覺得有乜問題

讚對港深貢獻大

李嘉誠獲胡主席接見，有人擔心會激起仇商情緒，范太尋晚出席新界社團聯會慶祝十一酒會時，統統表示唔同意。佢話李生對港深甚至其他好多地方都有好多貢獻，領導人禮貌上見一見佢，「係一件好平常嘅事」，唔覺得有乜大問題，相信社會亦「絕對唔會有咁大反應」。

范太仲話，李嘉誠無公職在身，因為多年嚟對港深有貢獻而獲領導人接見，又獲邀在大會上發言，港人見到應該為此而高興。佢又讚李生當日嘅發言水平好高，當日也是大會座上客嘅范太話，大會共安排四人發言，其中三人都係講述自己公司喺深圳嘅發展，無可厚非，而李生就無提到自己，只係講深圳嘅過去、現在同將來遠景。

至於香港樓價遏抑不下，范太就話，如果大家覺得港府做得慢，應該鞭策政府，「唔需要因此對某些人有成見，無必要吖」。