政情：副局政助放料自救
副局政助知名度低已經唔係咩新鮮事，大家都覺得佢哋
咁高人工又冇甚貢獻。早前佢哋獲邀組團訪問上海，本來都係宣傳自己嘅好機會，可惜新聞處又唔識做，深夜至識得發相，令佢哋嘅訪滬行程變晒隔夜新聞冇人報。一班副局政助可能深明「求人不如求己」嘅道理，返港後第一時間即刻上載自己訪滬相片上facebook「自救」。
尋日一上facebook，即見到環境局副局長潘潔、商務及經濟發展局副局長蘇錦樑、民政事務局副局長許曉暉及該局政治助理徐英偉都放咗訪滬嘅相片上去。大家上載嘅相片各自各精彩，共通點就係上載嘅相片都好有「個人主義」，各自喺相中搶佔有利位置，徐英偉更係「G模」上身，成個相簿都充滿佢嘅自拍添。
不過佢哋大部分只係post相上去，相片說明就欠奉，唔少人只係加咗句「到上海訪問四天」就算，大家對佢哋行程細節同得着都一無所知，就咁睇相仲以為佢哋「花公帑暢遊上海」添！