政情：區璟智遊敦煌以古鑑今
文化名城敦煌向來瑰麗動人，財經事務及庫務局常秘區璟智都趁暑假慕名去考察，佢匿埋莫高窟幾日，細心研究壁畫，驚嘆唐朝婦女流行着低胸裝、透視衫同燈籠褲，認真前衞！
高靜芝洛城探媽媽
暑假後首個行會午餐尋日喺文華舉行，頭箍小姐區璟智都係座上客之一，見佢皮膚曬黑咗，原來去完敦煌玩。敦煌有個名列世界文化遺產嘅莫高窟，頭箍小姐入到寶山，無理由空手而回，佢由朝睇到晚，連汁都撈埋。問佢有乜得着，頭箍小姐話，借鑑敦煌興衰有助香港發展，事關當年敦煌係中原通往西域嘅唯一通道，中西文化薈萃，有助激起新思維，可惜當海上絲綢之路興起，敦煌盛世就走下坡，反觀香港，亦係中西文化交匯點，要保持強勢就唔可以自滿，要不斷走在前面。
有份出席午宴嘅婦女事務委員會主席高靜芝（Sophia），暑期都出門充電，去美國洛杉磯探望年屆九十歲嘅媽媽，Sophia嘅兄弟姐妹都喺嗰邊發展，今次難得一家團聚，Sophia親自下廚，煎牛扒畀媽咪食，果然係孝順女。