中環耳目：江素惠皇朝會歎叉子燒餅
香江文化交流基金會創辦人、台灣工商協會會長江素惠（Susie）最近人逢喜事精神爽，事關佢獲港府頒授銅紫荊星章，係首位居港台灣人獲此榮譽，四方好友都戥佢開心。佢嘅一班舊同事，日前喺Susie至愛嘅皇朝會同佢食飯兼慶祝，皇朝會坤寧閣嘅行政總廚虞和霖特意為佢炮製肉鬆叉子燒餅、清炒河蝦仁，食到大家都讚不絕口。
促進港台交流獲肯定
Susie話，獲頒星章係對佢過去廿幾年促進港台交流努力嘅肯定，佢覺得好欣慰，未來佢想進入內地，進一步促進內地與台、港嘅交流。Susie居港近三十年，曾經出任台灣新聞局駐港機構光華新聞文化中心主任，直至○一年退任。
皇朝會坤寧閣係上海菜館，虞師傅原本係上海飲食界龍頭新亞集團嘅技術總監，九年前被禮聘嚟港。佢話畀卓妮聽，肉鬆叉子燒餅最大好處係可以當點心食，佢選用豬腩肉伴以炸菜、西芹同炒，再以即烤嘅燒餅伴食，入口香濃好味，係坤寧閣極受歡迎嘅傳統上海菜，幾乎每張枱都會點呢道佳餚。
