中環出更：盧文韻買Vica Moda皮草禦寒應急
近排天氣乍暖還寒，有時一日之內氣溫急降超過十度，如果冇睇住天氣預報嚟着衫，真係好容易冷親。卓妮早前喺尖沙咀半島酒店撞到利有實業董事長盧文韻（Jenny），原來當日佢着得太單薄，特登嚟選購禦寒衣物，最後花五千幾蚊買咗件靚靚皮草披肩，襯到佢十分高貴優雅。
經常喺度玩「變身」
Jenny當日幫襯嘅店舖Vica Moda，已經喺半島酒店地庫商場開咗好多年，主要賣絲質同埋茄士咩服飾。多年來Jenny經常喺呢度玩「變身」，原來佢早幾年仲係內地上市公司廈門汽車副董事長時，商務旅行十分頻密，有時由外地返港，啱啱落機就要趕赴酒會或晚宴，來不及返屋企換裝，佢就會嚟半島酒店買衫即時變身。
Jenny係活躍於社交圈嘅名人，幾年前佢打高球跌親，運動量減少令佢近年身形出現「巨變」，佢笑言依家「宰相肚內更能撐船」。雖然曝光率減低，但佢做善事同埋服務社群嘅熱情未減，現任港澳台灣同鄉慈善基金會永遠名譽總理、中文大學逸夫書院校董。
卓妮