政情:袋巾傑送孖仔放洋

公民黨副主席梁家傑離開香港成半個多月,尋日喺facebook上載咗一輯相,先至知道佢去咗英國放暑假。不過相中只有梁家傑一人,唔見佢太太同仔女蹤影,原來兩公婆帶一對孖仔去英國開學,梁太因為唔捨得啲仔女而泣不成聲,所以佢唔想喺facebook畀人見到。

梁家傑今年廿一歲嘅大女四年前開始喺英國讀書,今年十六歲嘅孖仔又分別考到喺蘇格蘭同威爾斯讀中六,所以兩公婆就陪兩個囝囝去開學,順道放假。三個仔女都出去闖天下,梁家傑話佢太太喺英國全程都喊,連自己都有啲情緒反應,覺得好似人生一個階段嘅結束咁,返港之後喺屋企得番佢同太太都有啲唔慣。

不過佢好快就要收拾心情,事關立法會由今個月開始陸續有會要開,十月更加要應付施政報告。至於梁太就做緊義工,忙於搞同公平貿易有關嘅嘢,十月空閒啲嘅時候可能飛去英國探仔。唔知平時愛插袋巾嘅梁家傑會唔會畀定幾條袋巾等太太帶去英國呢?

Money18新功能「18好路數」為你預測心水股票升跌機會率