政情：坐正無望 單雞知難而退？
民主黨換屆在即，早前盛傳副主席單仲偕（
雞）有機會坐正，取代何俊仁做黨主席，不過好衰唔衰，佢半年前plan好晒全家去南非睇世界盃，點知遇正623政改表決，加上佢哋「一人兩票」嘅區議會方案搞到全城起哄，雞喺白鴿黨多事之秋隱形，難免惹人非議，所以有傳佢「升呢」受阻，何俊仁眾望所歸，繼續留低。
撐鐵頭仁冧莊
普選聯尋日開內部座談會開到一點鐘，之後白鴿黨正副主席同埋學者一齊拉隊去灣仔開飯，雞兩點二度鬆人，但佢唔係「食唔落」，只係趕住返屋企交人陪老婆啫。雞大方表態支持鐵頭仁冧莊，話考慮繼續競選副主席；至於選唔選超級區議會，佢話呢個係成個黨嘅整體考慮，具體要等選舉條例、即係本地立法過咗後再說，事關選舉公職係整個黨嘅整體部署。
鐵頭仁遲佢十五分鐘走。問佢係咪蟬聯，佢話仲未知，但語調輕鬆，莫非坐定粒六？另一副主席劉慧卿就同蔡耀昌、黃碧雲一齊走，三個人出到門口仲傾唔停。問佢選唔選下屆立法會，佢就話時間尚早，至於黨主席之爭，佢話未有決定。