政情：鄭志剛步步高陞 勢任全國青聯副主席

消息透露，新一屆全國青聯委員已收到開會通知，邀請出席本月廿三日舉行嘅第十一屆全國青聯會議預備會，並出席廿四日喺人民大會堂舉行開幕儀式，屆時九名中央政治局常委都會出席，廿五日參觀交流，廿六日選出新一屆常委、副主席及主席。

按傳統，陳仲尼以香港青聯主席身份進身全國青聯副主席並不令人意外，但鄭志剛上位，估計係中央睇重其家族背景。環顧中央喺港區全國政協常委嘅安排，十多名常委中，本港幾大家族皆有代表，好似長實副主席李澤鉅、新地非執董郭炳湘、恒地副主席李家傑、新世界發展董事總經理鄭家純等；中央今次選擇鄭志剛，相信亦與家族背景不無關係。

陳仲尼險脫腳

其實無論喺內地或港澳兩地，鄭家除咗有龐大投資外，仲捐咗唔少錢，遠嘅唔講，最近就捐咗三千萬元畀澳門大學發展基金會。據聞，鄭家亦承諾分五年捐款五千萬，支持內地青年工作，第一期捐款已到位，件事喺本港政經圈子早已傳開。

由於副主席之位競爭太激烈，期間曾傳出陳仲尼可能脫腳，做唔成全國青聯副主席。據聞一眾香港青聯元老如霍震寰、黃英豪、曾智雄等人一致向中央表態，指香港青聯一向係全國青聯對口單位，多年來全國青聯副主席嘅香港代表，一直由香港青聯主席出任，經多番唇舌才得到中央團委、統戰部及中聯辦支持，陳仲尼上位才得以落實。

全國青聯常委嘅空缺一樣爭崩頭。據聞香港可望分到約十個空缺，好多身為全國青聯委員嘅富豪名人二代力爭更上層樓，當中曾被視為全國青聯副主席熱門嘅菁英會創會主席施榮忻及香港青聯常務副主席葉振都，據聞已獲默許做常委。有機會進身常委嘅包括霍老長子嫡孫霍啟剛、觀瀾湖球會主席朱樹豪大仔朱鼎健、莊士集團主席大仔莊家彬、信置主席黃志祥大仔黃永光、與新金王黃英豪攜手開拓網上商務平台嘅吳傑莊等。

今屆全國青聯仲有唔少新面孔，包括全國人大常委范徐麗泰兒子范駿華、合和實業主席胡應湘兒子胡文新、立法會議員林健鋒兒子林凱章及梁君彥兒子梁宏正、福建幫頭領盧文端兒子盧金榮、許晉亨外甥郭永亮等，數數吓幾乎政商界名人後代數勻晒。