中環出更：金刀梁眼鏡框平靚正

金刀梁生於醫生世家，家底豐厚，平日生活毫不奢華，梁太曾取笑老公財物唔多，一個膠袋裝得晒。講到戴眼鏡，佢只揀幾十蚊貨色，仲一次過狂掃十幾副。早前一個慈善活動以扮梁智鴻為主題，梁醫生慷慨借出「珍藏」，放喺V.I.P房任嘉賓借用，點知用家戴後覺超正，並「據為己有」，搞到金刀梁冇晒「後備框」。佢話，呢款框幾乎已絕版，要去指定嗰間舊式眼鏡舖補貨至得。

講起呢款方形黑色眼鏡框，唔少人覺得款式老土咗啲，金刀梁就喜歡佢襯晒面形，恍如度身訂造，加上框架超輕，優點咁多，絕對係物超所值。即使近年名牌眼鏡框推陳出新，功能又新又多，但金刀梁還是覺得佢最正，證明平嘢未必冇好嘢喎。