政情：吳斌「部長」Look上立會

呢個禮拜六就任滿嘅吳斌近排忽然高調，除咗循法律途徑搵審計署署長算帳外，仲瞓晒身介入八達通事件，臨尾跟單大嘢，吳斌梗係跟到貼，尋日立法會討論件事，佢都以私隱專員身份上去解畫，如無意外，呢次應該係佢最後一次以同樣身份出席立法會。或者係咁，吳斌特別隆重其事，一身黑西裝襯黑煲呔，只不過，呢個精心配搭就call起好多集體回憶，譬如酒樓部長。

吳斌把握呢次機會講述佢哋聆訊嘅發現，但都被揭發公署過去已經收過市民嘅投訴，但就冇任何發現，質疑公署調查不力，仲自嘲自己係無牙老虎，「棚牙畀啲立法會議員剝晒」。八達通單嘢睇怕有排查，到底邊個失職最後總會水落石出嘅。