政情：議員加碼乾蒸邱騰華
停車熄匙極具爭議，環境局局長邱騰華前日落區考察民情，試搭「蒸籠」的士同小巴，結果大汗疊細汗，搭完出嚟個樣都唔多妥。點知班立會議員睇完局長乾蒸後，似乎食過翻尋味，紛紛加碼要求邱騰華遊勻新界焗多次桑拿，認真好帶挈！
邱騰華早前落咗港九共五個地點試搭「熱狗巴」同「蒸籠的」，車內氣溫高達四十度，佢焗完之後疲態盡現。點知新界的士業界不滿邱騰華「厚此薄彼」，只焗「紅桑拿」，懶理「綠蒸籠」，故紛紛邀請佢嚟新界encore。街工議員梁耀忠同工聯會王國興亦都唔執輸，分別列咗五個同三個必到地點，希望邱騰華可以實地感受吓。
驟眼睇，阿忠同王國興列嘅地點都有啲相同，不外乎落馬洲、上水同深圳灣等「酷熱之都」，睇嚟佢哋真係想焗死邱騰華為止。停車熄匙法案委員會主席余若薇就話，仲未同邱騰華嗰邊夾好時間，不過就話上次視察五個地點，已經超時兩個鐘，希望各位議員明白，要局長去晒所有「必到」景點係冇可能喎！