政情：南區補選老外鬥尖子
南區區議會薄扶林選區補選九月五日投票，聽日開始接受提名，公民黨、社民連同匯賢智庫都已經準備好派人參選。公社兩黨經過一輪拗手瓜之後，決定由公民黨派人出選。至於匯賢尋日就公布，派出牛津尖子劉應東搶番本來屬匯賢嘅呢個選區議席。坊間盛傳公民黨會由曾經喺○六年參加特首選委會選舉嘅外籍人士司馬文參戰，換言之呢場補選將會係老外鬥尖子之戰！
劉應東係匯賢智庫名譽財務顧問，今年廿六歲，喺港大一年級讀精算，取得好成績獲獎學金到英國牛津大學攻讀金融，仲一併完成碩士課程，回港後加入麥格理資本證券股份有限公司做高層，前途無限，竟然有興趣從政。
尋日公社兩黨亦發表聯合聲明，話經過協調之後達成共識，就係由公民黨派人參選。對呢個區會議席極有興趣嘅社民連「維園阿哥」任亮憲話，一切都係以大局為重，即使最後由公民黨嘅人參選，佢都樂意為對方站台。