中環出更：Ann蔣買LV獎勵自己
女人，總期待另一半喺適當時候送個名貴包包，氹自己開心，但原來自己畀錢買，一樣開心。著名工業家蔣震千金蔣麗芸（Ann），就鍾意買LV手袋氹自己開心。
事業女性 唔使人送
早前出席中總大廈新貌開幕禮，Ann蔣拎住個LV Monogram Vernis系列漆皮手袋，鬼咁風騷，個袋售價九千四百蚊。卓妮以為係老公梁海明送贈嘅，點知Ann蔣好有性格咁話：「我哋呢啲事業女性，慣咗自己買嘢畀自己，唔使等人送嘅！」
獎勵自己其實有原因。Ann蔣話，過去三個月努力減肥，每日跑一粒鐘跑步機，又舉吓啞鈴，風雨不改咁鍛煉，手臂肉果然bye bye，成個人輕咗十幾磅。
睇真啲，Ann蔣一張鵝蛋臉已變成瓜子臉，腰肢都纖細埋，佢個人就相當滿意減肥成果，但老公就詐型，叫老婆唔好再瘦喎。
卓妮