政情：私隱署又擺空城計？
私隱專員吳斌尋日上電台「烽煙」節目，自爆今個月底卸任，但至今仲未知邊個接棒，暗踩政府歎慢板。嘩！七月唔夠十日就完，政府遲遲唔公布私隱專員接任人，唔通又想擺空城計，重演○五年時，前任私隱專員鄧爾邦離任半年後至有新人上場嘅鬧劇？其實，私隱專員公署屢鬧醜聞，橫豎政府咁唔重視專員呢個位，倒不如乾手淨腳摺咗佢，將公署拉閘收檔啦！
今年初吳斌突然以個人聲明方式爆料，話私隱專員個位坐到今個月三十一日，即係下星期六就卸任走人，當時官場有人思疑，吳斌只係向政府出招，將不獲續約美化成自行選擇「唔撈」。吳斌在位時愛同政府打對台，估唔到臨別在即，都要再次喺電子傳媒爆料，令政府難堪，真係鬼打鬼！
吳斌話，下星期六就卸任，佢想交棒，都唔知交畀邊個，仲話自己○五年履新時，上手鄧爾邦已經離職六個幾月，佢唔想事件翻版，「唔希望有太長時間嘅time gap」咁話。佢咁講，畀人覺得一係喺度暗寸政府物色接任人歎慢板、無效率，搞到佢要交空棒；一係話當局遲遲唔公布人選，無厘規矩。無論開邊瓣都好，矛頭都係指向政府，擺明同政府過唔去。
執掌期間 屢爆醜聞
吳斌仲有唔夠十日就離開公署，繼任人選至今未公布，件事的確有問題，政府同吳斌勾心鬥角啫，但唔係三國魏蜀吳大戰吖，成日對私隱公署擺空城計，拖慢公署效率，受害嘅咪又係投訴嘅市民。
不過，政府同吳斌唔咬弦，梗係唔止政府有問題啦。吳斌執掌嘅私隱專員公署過往多次爆出醜聞，兩名前任專員劉嘉敏同鄧爾邦在職期間都涉嫌濫用公帑，被指其身不正，吳斌接手後，一樣屢傳醜聞，去年底更被審計署點名狠批「大花筒」亂用公帑同行政混亂，好似租用貴價辦公室、處理投訴唔達標、公幹應酬開支無準則咁，其中吳斌亦係矛頭焦點，被指出差唔入住主辦單位提供嘅免費酒店，另租酒店亂使錢。爛咗嘅蘋果留嚟做乜？政府索性唔使為吳斌物色繼任人，將公署摺咗佢算啦！