政情：啟剛世界盃齋睇轉播
愈嚟愈戴得多帽嘅霍啟剛，時間表排到密麻麻。身為廣州亞運會香港賽會志願者隊伍團長嘅佢，尋日為香港志願者協會招募亞運會義工進行面試，嚟緊六月中佢又要帶青年團去天津，八月又要做團長，帶團去新加坡出席青少年世運會。
咁啱世界盃六月十一日開幕，佢都行唔開。霍家成員大部分都有體育狂熱細胞，啟剛爸爸Tim霍一早講咗到時會飛過去出席開幕禮，二佬啟山亦會飛過去睇決賽同閉幕禮，Tim霍仲話希望到時可以撲到飛陪啟山一齊睇閉幕。啟剛無緣親身過去感染氣氛，只可以留喺屋企睇電視轉播。
為亞運會義工面試
不過做嘢緊要，好似今次嘅香港賽會志願者咁，有成五百幾個人報名，個個都要自費畀住宿同交通費用，所以義工團依家努力傾緊大學住宿嘅價錢，如果可以搵到贊助就更好啦！啟剛話義工責任重大，因為所有入亞運村嘅人，第一個接觸嘅就係義工，所以除咗親切笑容同友善態度之外，語言都好重要。今次嚟面試嘅義工除咗廣東話、英文同普通話了得之外，有啲仲識法文，相當厲害。