政情：梁永立戒消夜減磅
唔少高官退休後畀私人機構羅致，但○六年退休嘅前食物環境衞生署署長梁永立，就甘於做大義工過平淡生活。梁永立係政府御用智囊智經研究中心嘅秘書長，早排又接替梁智鴻做人類生殖科技管理局主席，但全部都係大義工，冇錢落袋。退休之後梁永立作息定時，唔食消夜，身體反而健康咗，仲清減咗成十五磅添。
梁永立話，退休之後但凡有錢賺嘅嘢都唔做，因為冇錢收嘅公職自由好多，唔會咁困身。佢之前做食環嗰陣，晚晚都八、九點先收得工，返到屋企十點先食飯，逼住晚飯當消夜。退休之後知道要作息定時，先可以保持身體健康，最大心得就係戒食消夜，仲講笑話千祈唔好跟智經主席胡定旭食飯，否則一晚食足三餐，想唔肥都難啦！
依家佢一個禮拜平均返三日智經，其餘時間就喺屋企煲韓劇。點解睇韓劇？原來貪佢節奏夠慢，啱晒退休人士生活節奏，相反港產電視劇一集劇情進展等於五集韓劇，節奏太快唔啱佢口味咁話，果然別有一番心得，退休高官不妨參考吓。