政情：潘佩璆直選夢未死心
工聯會立法會勞工界代表潘佩璆近期突然高調，早前遊行抗議東隧加價同出面要求運輸署改善巴士車長工作環境，尋日又開記者會，公布反對電車加價民調。睇嚟潘佩璆想對外傳遞一個政治訊息，就係出戰港島心未死，不過，佢揀嘅議題統統都同運輸業有關，小心傳錯訊息，令人以為佢想挑戰自由黨劉健儀，轉戰航運交通界喎。
知名度唔高嘅潘佩璆，二○一二年轉戰港島嘅行情一直不被看好，早前工聯會會長鄭耀棠更指，本身係聯合醫院顧問醫生嘅潘唔排除轉攻醫學界。但潘佩璆對直選似乎仲未死心喎，近期搏命谷曝光率，今月中已經上街拉過橫幅，大聲疾呼抗議東隧無良加價，尋日再添食，喺港台節目《給香港的信》撰文，反對東隧加價，咁都未夠，朝早仲開埋記者會，公布市民反對電車加價民調，樣樣同民生有關，意圖好明顯，想博人氣反彈玩直選囉，不過，佢最後有冇得落場玩，就要睇過至知嘞！