中環出更：金刀梁兩邊走皮鞋裝假狗
政商名人貴人事忙，周不時一日之內要走幾場，所以有一對着得舒適嘅鞋非常重要。尋日港大護理學院搞咗個步行籌款活動，行政會議成員梁智鴻着咗對皮鞋出席，原來佢為咗應付兩個性質不同嘅場合，專登揀咗對仿皮面嘅膠底鞋，方便行山之餘又見得人，佢笑言：「呢啲咪叫做裝假狗囉！」
講起金刀梁，唔少人都會即刻諗起佢十年如一日嘅中間分界髮型同黑膠框眼鏡，但其實金刀梁對皮鞋亦都好長情架。金刀梁好忙，又要去醫院巡房，搞到着親嘅鞋都好快爛，誇張到平均三、四個月就要報銷。後來朋友就介紹佢去以前中環龍子行買美國老牌Allen Edmond皮鞋，果然襟着並迅即成為金刀梁嘅「飛佛」。後來龍子行結業，香港再冇代理商，佢太太每次去親美國開會，都會幫佢入貨。
捧執笠牌子夠長情
不過講到尾，皮底鞋始終不及膠底鞋舒適。金刀梁十幾年前偶然喺銅鑼灣糖街發現咗一間叫Follonica嘅本地鞋舖，佢哋嘅自家製皮面膠底鞋唔單止啱晒佢心水，仲要每對只係賣六十蚊，而佢尋日着住嘅「裝假狗皮鞋」就係Follonica嘅出品嘞。
雖然Follonica有金刀梁呢個長期粉絲，但仍難逃要結業嘅命運。三年前，Follonica老闆就坦白同金刀梁講，話抵受唔住加租，就快唔做，仲話佢哋有六、七對存貨，睇吓金刀梁有冇興趣。金刀梁二話不說就買晒現成存貨，依家仲有四對喺屋企看門口。
由金刀梁「買鞋的故事」睇嚟，就知道佢係一個非常長情嘅人，兼專捧執笠牌子。其實佢以前都講過，曾經去舊式眼鏡舖，一次過入咗幾副戴開嘅粗黑膠框眼鏡，睇嚟佢真係喜歡「囤積居奇」喎！
卓妮