政情：網民不屑陳岳鵬變臉

Ronald係「80後」，抗爭方式都好「80後」，早排抗議港鐵玩過活埋，畀居民倒泥頭埋自己；其後薄扶林街坊搞遊行，佢仲以ＳＭ方式，自縛兼用布塞住把口抗議。

早前政府公布佢入特首辦，同日掀起網上討論。有網民指佢轉工好着數，但質疑佢明知要辭職，點解仲做到咁激咁反政府；依家入去政府，講唔通！網民不屑話：「佢之前咁激反政府，我唔覺得佢係為南區選民，係為追尋刺激就真！」有網民仲質疑：「之前以為陳先生靠得住，點知依家離佢哋而去……陳先生，有咁發達得咁發達啦！」

陳岳鵬就自辯話，辭議席加入政府，喺外國習以為常，美國總統奧巴馬同國務卿希拉妮都辭咗議席同搞補選啦！至於以前咁激，都係反映居民意見，政府又唔係佢仇人，雙方又唔係勢不兩立，入到去都會反映居民意見。