政情：王廷歆唔蒲頭龔仁心愛莫能助
已故華懋集團主席龔如心嘅家翁王廷歆去年向高院申請，要求由龔如心嘅遺產撥款支持他打官司爭奪遺產，結果申請被否決，日前被判要交付約七十萬元訟費予遺產管理人。華懋集團掌舵人龔仁心尋日同太太出席姨甥周嘉俞有份嘅全威集團公司晚宴時話，目前唔知道王廷歆身在何處，所以想幫手都幫唔到，同事只能如常向王廷歆支付生活費。
呻生活無私隱
龔仁心又話，爭產案上訴期內一切事項已交由律師處理，至於案件幾時完結，佢話按目前情況，一直上訴到終審法院，估計要兩年時間。龔仁心尋晚以嘉賓身份出席晚宴，依舊吸引大批記者簇擁採訪。佢坦言，現時生活同以前做醫生比較，最大分別係身邊多咗好多記者，無晒私隱，最唔慣係太太，最怕成日被人影相，希望記者對佢太太手下留情喎！
不過，龔仁心話佢太太都有樣嘢開心，就係多得傳媒無孔不入，平時佢嘅一舉一動，佢太太都一清二楚。龔仁心又話，以前做醫生都有得「落場」休息吓，但依家返寫字樓工就無嘞！問龔仁心點睇近期嘅希臘經濟危機，佢就反問：「依家邊個國家要破產吖？希臘人自己都未驚啦，出嚟示威就梗有啦，叫政府慳啲使嘛！」