話說有個過氣租客，明明搬走就快二十年，仲係冤魂不散自出自入，指手畫腳，一時彈個浴缸太細唔舒服，一時話張床移咗位影響風水，本來已經夠乞人憎，家陣仲要趁人哋就嚟擺酒賀壽過嚟踩場，真係是可忍，孰不可忍！
冇錯喇，功夫茶講緊嘅就係有「千古罪人」之稱嘅末代港督彭定康。距離香港回歸二十周年仲有兩個禮拜之際，肥彭獲邀來港出席論壇，由於要入醫院做例行檢查，所以改為播放錄影致詞片段。唔使問阿貴，佢老哥今次又係狗口長不出象牙，話多年嚟留意到北京對香港加緊管治，嘗試干預香港特區政府每個環節，令人質疑香港嘅自主情況；又聲稱香港三權分立中嘅「立法」一環倒退，令港人變得激進；總之來來去去三幅被，就係唱衰香港。
好心佢搵盆水照吓自己喇，自從英國佬執包袱返鄉下，香港已經係中國人嘅地方，係好係醜，點都輪唔到英國佬出聲。特別係肥彭，有名你叫「千古罪人」，臨走前埋地雷放炸彈，今時今日香港烏煙瘴氣，亂象叢生，作為始作俑者呢筆數都未同佢計，居然掉番轉頭說三道四，指點江山，攞景定贈興吖？
講真，英國家陣問題一大堆，恐襲、脫歐、蘇格蘭獨立……與其多管閒事，不如顧掂自己先；最好笑嘅係，肥彭數到香港呢樣唔掂嗰樣唔掂，查實係有口話人冇口話自己，唔使講第樣，淨係睇吓今次倫敦公屋大火，堂堂首都公共建設水平連第三世界都不如，憑乜嘢也文也武扮晒導師呀！
冇計喇，肥彭喺祖家早就係舊電池，就算發噏風都只能淪為「英國維園阿伯」，根本無人會睬佢；喺香港就唔同嘞，次次肥彭嚟到，戀英慕殖港獨分子、漢奸黎一類洋奴賣港賊以及佢哋豢養嘅反對派政客，一早恭迎大駕，十足十久盼主人返屋企嘅狗仔咁款，成棚人如蟻附羶，吹捧鑽拍唯恐不及，試問呢種存在感仲可以去邊度搵？
當然喇，肥彭嚟香港接受吓粉絲膜拜，食吓蛋撻做吓爛騷還可以，想搞亂香港喎，發夢都冇咁早。正如北大人話齋，香港一向都係國際政治角力場，好在有駐港解放軍肩負維護國家安全同香港繁榮穩定重責，例如非法佔中一役，駐軍就係香港嘅「堅強後盾」。大家有眼見，連文翠珊甚至特朗普都唔敢公開對香港事務阿芝阿佐，肥彭呢挺過氣政客想興風作浪，秤吓自己幾斤幾両先喇！
功夫茶喺度奉勸肥彭一句︰牢騷太盛防腸斷，風物長宜放眼量。佢老哥冇耐前至做過心臟手術，好應該保重身體，好好過埋收尾幾年，繼續妄圖亂港，只會「搗亂，失敗；再搗亂，再失敗，直至滅亡」嘅咋。