政情：議員勁寸高官IT Out爆

葉劉淑儀批評，官員依家一律用其職位嘅英文簡寫作電郵名稱，而唔係用真實姓名，做法不可取。政府資訊科技總監葛輝就話，官員電郵係咪進一步個人化屬於個人選擇，不過佢哋會鼓勵各部門多用互聯網同市民交流。

葉太當然唔滿意呢個敷衍答法啦，佢話連美國總統奧巴馬嘅官方電郵都係用自己名，唔明官員點解唔肯用「個人面貌示人」：「起碼要由問責官員開始啦……問責官員冇理由怕用名，官員驚乜呢？」

Eva鄭度屎橋鬼咁

官方電郵唔用真名，唔少市民都擔心自己嘅電郵唔知寄咗去邊。黃定光（象哥）就點出，好多中小企寧願親自去郵局寄信畀各政府部門都唔用電郵，質疑政府有關服務未能切合中小企嘅需要。葛輝即時畀象哥嘅問題考起，話要進一步研究點解有咁嘅情況出現，佢仲求其搵個藉口搪塞，指中小企可能慣咗有文件揸手作存檔之用喎。象哥即時寸佢：「網上存檔仲方便過hard copy啦！」佢認為問題癥結在於政府宣傳不足。

有議員尋日就跟進運輸及房屋局局長鄭汝樺（Eva）三小時Facebook嘅政治騷事件，劉慧卿質問局方究竟係邊個官員諗出呢條屎橋，搞到Eva鬼咁。

事實上，高鐵事件後政府為「補鑊」，話要研究外國政府用Facebook、Twitter等社交網站同市民溝通嘅做法，不過講來講去都依然停留喺研究階段，守尾門嘅委員會主席譚偉豪尋日就問局方到底研究邊啲國家要搞咁耐，不過佢得到嘅竟然係「研究仲進行緊，未有最終答案」！難為佢哋答得出。