太陽及時雨決戰湖人
鳳凰城太陽事隔四季再度殺入西岸決賽，球隊日前亦已展開操練，希望可以恃勇瓦解「紫金皇朝」。太陽賽前收到好消息，中鋒羅賓盧比斯有望擺脫腰傷復出，而領袖拿殊亦已「開眼」，右眼縫針後陸續消腫，毋須再以「單眼」比賽。
正所謂得內線、得天下，湖人除擁有高比拜仁外，亦坐擁兩位身高超過7呎嘅巨人加素及拜林，加上後備席廂又有擅打內線嘅奧當，面對平均身高較矮嘅鳳凰城，自然被睇高一線。不過，太陽賽前收到好消息，季尾受到腰傷困擾嘅年輕中鋒羅賓盧比斯已經傷愈，而教練根特利亦透露，佢係時候復出對抗紫金「雙塔」。
沿用Run & Gun及三分雨
雖然羅賓盧比斯只係一名二年生，但呢位7呎中鋒今年一月開始，已被根特利委任為正選中鋒，結果自擔大旗以來，出場31次平均獲得11.3分、6.3個籃板及1.1次封阻嘅優異數據，所以今次復出絕對係球隊及時雨。根特利表示：「距離首回合仍有數天時間，我相信盧比斯可趕及復出，解決內線不足嘅煩惱。」
不過，太陽並唔會因為羅賓盧比斯復出而改變快速打法，根特利強調會沿用「Run & Gun」及「三分雨」戰術，避免在內線與湖人硬碰。西岸決賽首回合將在香港時間下周二早上9時上演，屆時湖人會先獲主場優勢。
■本報綜合報道